Tá Corca Dhuibhne ar cheann de mhór-Ghaeltachtaí Chúige Mumhan. An aidhm atá ag Oidhreacht Chorca Dhuibhne ná traidisiún ársa teangan, chultúir, litríochta is sheandálaíochta na Gaeltachta seo a chaomhnú, a bhuanú is a chur chun cinn ar mhaithe le pobal an cheanntair agus do thurasóirí is do chuairteoirí chun na háite.

Deintear iarracht ar leith, tré ghníomhartha na hOidhreachta. an Ghaoluinn a bhuanú mar theanga theaghlaigh, teanga an phobail agus teanga an lucht ghnó. Is mór ag Oidhreacht Chorca Dhuibhne an tacaíocht a fhaigheann an t-eagras ón Roinn Gnóthaí Pobail, Comhionannais agus Gaeltachta, ó Údarás na Gaeltachta, ón gComhairle Ealaíon is ón gComhairle Oidhreachta.

Tá foireann Oidhreacht Chorca Dhuibhne ag obair i bpáirt leis an bpobal ins na príomhbhailte Gaeltachta seo a leanas chomh maith le hinstitiúidí oideachais an cheanntair. Tá ollscolaíocht tré mheán na Gaoluinne á cur chun cinn ag an Oidhreacht i gcomhar le hAcadamh na hOllscolaíochta Gaeilge, Ollscoil na hÉireann, Gaillimh.